John Milton

Dr John Milton (* 9. Dezämber 1608 z London; † 8. Novämber 1674 z Bunhill bi London) isch en änglische Dichder, politische Dänker und Staatsbedienstete under em Oliver Cromwell gsi.

In sine Gedicht und Prosawärk het sich dr Milton mit dr persönlige Schuld beschafdigt, het sim Strääbe noch Freihäit und Sälbstbestimmig Usdruck gee und het die dringende Aagläägehäite und politische Unrueje in siner Zit behandlet. Er het uf Änglisch, Latiinisch und Italiänisch gschriibe und isch scho zu Läbzite wältberüemt worde. Er isch e früeje Aahönger vo dr Ufkläärig gsi und het groosse Iifluss ghaa, isch aber wil er e republikanischs Regierigssüsteem understützt het, au umstritte gsi. Si Areopagitica , wo under Vorzensur entstande isch, ghöört zu de bedütendste Wärk für Reed- und Pressfreihäit in dr Gschicht. Si bekanntsts Wärk isch s epische Gedicht Paradise Lost (S verloorene Paradiis). Bis hüte cha mä si Iifluss in dr angelsäggsische Litratuur und Kultur gsee.